Hetimet për vrasjen e 61-vjeçarit shqiptar Ilirijan Minaj të premten e kaluar në godinën në via Fratelli Corradini 6 në Bibbiano, Itali vijojnë ende.

Ditën e djeshme avokatët vizituan për herë të parë godinën ku ndodhi ngjarja e rëndë pasi duan të kuptojnë disa detaje për të rindërtuar dinamikën dhe versionet e ndryshme që qarkullojnë.

Sipas historisë së parë të dhënë hetuesve nga autori italian Riccardo Stefan, nën hetim për vrasje me dashje, Minaj e ka sulmuar i pari për mosmarrëveshje të mëparshme. Ai ka deklaruar se është mbyllur në shtëpi me nënën e tij pasi shqiptari ka goditur me grusht derën, e cila ka mbetur e thyer në qendër. Në këtë moment Stefani ka marrë thikën dhe e ka goditur shqiptarin nga vrima e derës.

Por vajza dhe gruaja e viktimës, Giulia Minaj dhe Natasha Bylykbashi, kanë nxjerrë një version tjetër. Sipas tyre Stefani ka qenë jashta duke pritur Ilirjanin dhe aty e ka goditur me thikë ne mes të shkallëve.

“Mamaja e Stefanit kishte mbyllur derën e shtëpisë duke e lënë djalin jashtë. Derën nuk e ka thyer babai im, por Stefani që hyri me forcë dhe mori thikën”.

Shkak për ngjarjen, sipas Stefanit, u ishin bërë shakatë e mëparshme që kishin pasur mes njëri-tjetrin. Por edhe ky pretendim mohohet nga familja e shqiptarit.

“Nuk ka pasur asnjëherë shaka. Dhe atë natë, nga ana e Stefanit nuk pati asnjë lloj vetëmbrojtjeje të ligjshme”.

Shkaqet e kësaj ngjarjeje të rëndë mbeten ende për t’u sqaruar, mbi të gjitha për shkak të dy versioneve që japin tashmë palët. Ndërkohë, pritet po ashtu që të bëhen publike edhe rezultatet e autopsisë mbi trupin e shqiptarit.