Të hënën ka vazhduar gjykimi nga Afrim T, i cili akuzohet për vrasjen e gruas së tij, Shqiponja I. Më 25 shtator 2022, gruaja nga Kosova u gjet e vdekur në banjon e shtëpisë në Zvicër në Bergdietikon.

Fillimisht u dyshua se ajo ia kishte marrë jetën vetës, por pas hetimeve u konstatua se 41-vjeçarja ishte vrarë nga burri i saj, Afrim T, shtetas zviceran me rrënjë shqiptare nga Maqedonia e Veriut, siç kishte njoftuar asokohe prokurori publik i Aargaut. Sipas prokurorit, krimi ishte kryer nga i akuzuar “duke përdorur forcë brutale”.

Seanca e së hënës ishte e dyta lidhur me këtë rast. Për këtë ka raportuar edhe gazeta e njohur zvicerane Blick.ch.

Sipas kësaj gazete, për Afrim T, prokuroria zvicerane kërkon 18 vjet burgim. Dëshminë e saj gjatë seancë e ka dhënë edhe motra e të akuzuarit.

Ajo ka thënë se ka pasur marrëdhënie shumë të mira me familjen e viktimës. Sipas saj, nuk ka pasur asnjë kontakt me familjarët e të ndjerës që nga koha kur ka ndodhur ngjarja e rëndë.

“Nuk na lejuan të merrnim pjesë as në varrim”, tha ajo. Dëshminë e vazhdoi duke thënë se ajo kishte frikë pas këtij rasti dhe se gjithmonë lëvizte e shoqëruar nga të afërmit.

Tutje gazeta shkruan se motra e të pandehurit nuk ka treguar nëse ka frikë se mund të ndodh ndonjë hakmarrje.

Ajo thotë se kishte raporte tejet të mira me kunatën e saj (viktimën). Tutje theksoi se disa herë e kishte vizituar të vëllain në burg, dhe se ai ishte “penduar shumë për krimin”.

Dëshmitarja vazhdon duke thënë se e ka dashur shumë gruan e vëllait të saj. Ato i shkruanin shpesh njëra-tjetres, flisnin në telefon dhe takoheshin shpesh.

Papritur avokati i familjes së viktimës e ndërpreu marrjen në pyetje gjatë seancës. Arsyeja e kësaj ndërprerje ishte se nëna e viktimës nuk ndihet fare mirë.

Ajo qante, dridhej e tëra dhe në fund u nxorr nga salla nga një i afërm. Në këtë seancë ishte paraparë që të dëshmonte edhe nëna e viktimës, por për shkaqe shëndetësore nuk kishte pasur mundësi për një gjë të tillë.