Një lojë në TikTok e quajtur “sfidë apo e vërtetë” po vë në rrezik jetën e dhjetëra fëmijëve të shkollave fillore në Kosovë.

Fëmijët të influencuar nga rrjeti social marrin pjesë në sfidë duke lënduar veten.

Sipas mediave lokale, dy shkolla në komunën e Fushë Kosovës dhe një në Komunën e Lipjanit, kanë raportuar për raste të vetëlëndimit të nxënësve.

Në shkollën “17 Shkurti” në Gllogovec të Lipjanit tre nxënës të moshës nën 14-vjeç kanë marrë pjesë në këtë lojë. Ata kanë parë një video që qarkullon në Tik Tok dhe me mprehese të lapsave i kanë shkaktuar lëndime vetes.

Por rastet në Lipjan nuk janë të vetmet, pasi 17 vetëlëndime të nxënësve janë regjistruar edhe në Fushë Kosovë, në shkollën “Mihail Grameno” dhe shkollën “Daut Bogujevci”.

Kjo “lojë” bëhet për të nxjerrë dhimbjen nga vetja, me gërvishtje të pjesës së krahut. Nxënësit po influencohen nga një video që qarkullon në Tik Tok dhe po sfidojnë njëri tjetrin.

Policia e Kosovës thotë se është duke i trajtuar të gjitha informacionet me institucionet përkatëse. Për këto ngjarje është njoftuar edhe Drejtoria për Arsim në komunën e Lipjanit.

Si pasojë e kësaj sfide dhe këtyre incidenteve në disa prej shkollave janë anuluar aktivitet për 1 qershor.