Policia e Tiranës ka dalë me një reagim zyrtar lidhur me video që u publikua ditën e sotme në mediat sociale, ku shihej se një shtetas dhunonte fizikisht nënën e tij.

Lidhur me rastin Policia njofton se është vënë në pranga agresori 36-vjeç i cili ishte edhe nën masën e sigurisë “Arrest në shtëpi”.

Ngjarja u publikua pasditen e kësaj të mërkure, ku në një video të denoncuar nga banorët e lagjes, shihet se si 39-vjeçari dhunon nënën duke e kapur prej flokësh dhe e shtyn fort, teksa i bërtet me të madhe. Banori që ka denoncuar rastin është shprehur se agresori sapo ka dalë nga burgu dhe dyshohet se vuan nga probleme të shëndetit mendor.

Njoftimi i policisë:

Në lidhje me një video të publikuar ditën e sotme, në portalin “JOQ”, në të cilën shfaqet një shtetas që dhunon nënën e tij, ju informojmë se: Strukturat e Komisariatit të Policisë Nr. 4, menjëherë pas publikimit të rastit, identifikuan dhe shoqëruan shtetasin G. K., 36 vjeç, banues në Tiranë, aktualisht me masë sigurimi personal “Arrest në shtëpi”, për veprën penale “Dhuna në familje”.

Në vijim të veprimeve u bë arrestimi i tij për veprat penale “Dhuna në familje”, dhe “Largimi i të burgosurit nga vendi i qëndrimit”.

Drejtoria Vendore e Policisë Tiranë falënderon dhe fton mediat e qytetarët që të denoncojnë rastet e paligjshmërive në çdo formë të shfaqjes së tyre, në numrin 112, duke iu garantuar anonimat të plotë dhe reagim të menjëhershëm.