Deputeti i Partisë Demokratike në opozitë, Ervin Salianji, u vetëdorëzua pasditen e 27 shtatorit në policinë e Tiranës, për t’iu nënshtruar procedurave për vuajtjen e dënimit me një vit burgim.

Vendimi ndaj tij u mor një ditë më parë nga Gjykata e Apelit, në lidhje me akuzën “kallëzim i rremë”.

Apeli la në fuqi vendimin që kishte dhënë Gjykata e shkallës së Parë, për rastin e një audio-përgjimi, ku pretendohej se vëllai i ish-ministrit të Brendshëm, Fatmir Xhafaj, ishte përfshirë në trafik droge.

Salianji u paraqit në polici rreth orës 17:00, ndërsa u shoqërua nga dhjetëra mbështetës të tij.

Më herët, pas përfundimit të mbledhjes së grupit të deputetëve të PD-së, ai deklaroi se betejën e tij do ta vijojë edhe nga qelia.

“Çdo përpjekje që kam bërë ka qenë për interesin publik. Pavarësisht se gjatë diskutimeve, grupi i PD-së vendosi të ngujohej në seli me idenë e një përplasje, duke qenë se është vendim politik, por duke qenë se unë jam shprehur se do përballem kudo që ta kërkojnë, duke privuar lirinë nj[ vit, do ta bëj betejën aty”, u shpreh Salianji.

Më pas ai u nis drejt policisë së Tiranës, ku pas procedurave niset për të vuajtur dënimin në burgun e Fierit.

Në mbledhjen e grupit të PD-së është vendosur që më 6 tetor të organizohet një protestë, për të kundërshtuar vendimin për Salianjin, që PD e cilëson politik.

Kreu i grupit të deputetëve demokratë, Gazment Bardhi tha se me shumicën socialiste nuk do të ketë më asnjë marrëdhënie normale në Kuvend.

Në audio-përgjimin, që u publikua në vitin 2018 nga deputeti Salianji, pretendohej për një bisedë mes vëllait të ministrit të Brendshëm të asaj kohe, Fatmir Xhafa dhe një ish-të dënuari në Itali për trafik droge.

Opozita kërkoi dorëheqjen e Xhafajt, ndërsa ai vetë mohoi që i vëllai të ishte përfshirë në trafik droge.

Sipas prokurorisë, biseda ishte e sajuar dhe Salianji ishte përfshirë në “krijimin e provave të rreme për të dëmtuar politikisht ministrin Fatmir Xhafaj”.