Deputeti i Lëvizjes Vetëvendosje, Sali Zyba, e ka quajtur “kërcënim” deklaratën e kryetarit të AAK’së, Ramush Haradinaj, i cili tha se kushdo që rrezikon ushtarët amerikanë në Kosovë, do të ndëshkohet.

Zyba me anë të një postimi në ‘Facebook’ tha se nëse merret seriozisht statusi i haradinaj, ai është “kërcënim i hapur” ndaj kryeministrit të Kosovës, Albin Kurtit dhe qeverisë.

“Nëse statusin e Ramush Haradinajt nuk e marrim si kërcënim të hapur për Kryeministrin Kurti edhe qeverinë e Republikës së Kosovës atëherë po pajtohemi që askush më nuk e merr seriozisht”, deklaroi Zyba.

Kjo vjen pas qëndrimit që mori Haradinaj pas deklaratës së ambasadorit amerikan në Kosovë se me hapjen e Urës së Ibrit rrezikohen ushtarët amerikanë. Kreu i AAK’së tha se kushdo që rrezikon ushtarët amerikanë është armik i Kosovës.

“Kushdo që rrezikon ushtarët amerikanë në Kosovë, as nuk i takon Kosovës dhe as nuk do t’i takojë Kosovës. Është vetëm kundër Kosovës. Dhe, si armik i Kosovës do të trajtohet! Prandaj, ose do të jetë në burg ose do të ikë e fshehet nga Kosova! Pavarësisht çfarë shtetësie ka dhe çfarë detyre ka, ai-ajo-ata do të ndëshkohen”, deklaroi Haradinaj.

“Të gjithë ju që keni përgjegjësi shtetërore, nëse e gjeni veten këtu, pas lutjes (edhe publike) amerikane për Qeverinë e Kosovës, dijeni se s’do ta keni mbrojtje petkun që ju mbështjellë përkohësisht”, përfundoi ai. /