Tash e një kohë, grupi famëkeq ‘Albkings’ në rrjetin social Telegram, ka si cak denigrimin e vajzave dhe grave kosovare. Rreth 140 mijë anëtarë që ndodhen në atë grup, kanë mundësinë të shohin fotografi e video intime të vajzave e grave, në shumë raste edhe të manipuluara, si dhe të sigurojnë kontaktet e tyre. Për këtë, deri më tash janë arrestuar disa persona, raporton Gazeta Sinjali.
Burimet e Gazetës Sinjali bëjnë me dije se ndihmën e Policisë së fundi e ka kërkuar edhe një 23-vjeçare në Prizren. Kjo pasi në këtë grup ka qarkulluar një video intime e saj.
Lidhur me këtë, burimet njoftojnë se është arrestuar një person i dyshuar, i cili është shoqëruar në stacion policor.
33-vjeçari është intervistuar nga organet e hetuesisë, pasi i njëjti dyshohet se ka incizuar në mënyrë të paautorizuar viktimën dhe më pas pamjet i ka shpërndarë në grupin ‘Albkings’.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor, nën dyshimet për kryerjen e veprës penale ‘Fotografimi dhe incizimet tjera të paautorizuara’.
