Borxhet prej qindra e mijëra eurove shumë shpesh kanë shkaktuar incidente, e madje kanë eskaluar edhe në sulme, kërcënime serioze e kidnapime. Kështu dyshohet të ketë ndodhur me 64-vjeçarin që u rrëmbye para disa javësh në Prishtinë. Huazimi i një shume të parave dhe moskthimi i tyre i kushtoi atij me rrëmbim, raporton Gazeta Sinjali.
Siç merr vesh Sinjali, i dyshuari për rastin është Hasan Hasani, 57-vjeçar, i cili tashmë ndodhet nën masën e ndalimit policor.
Hasani dyshohet se e ka rrëmbyer viktimën më 26 shkurt dhe e ka mbajtur me zor në një pjesë malore në Prishtinë, për disa orë, ku dyshohet ta ketë kërcënuar.
Sipas informacioneve të para, motivi i rrëmbimit dyshohet se lidhet me një borxh që viktima ka pasur ndaj të dyshuarit.
Policia ka arritur të sigurojë prezencën e të dyshuarit dhe i njëjti është intervistuar gjatë ditës së djeshme, me ç’rast ka dhënë deklaratën e tij për rastin.
Pas përfundimit të procedurave, Prokurori i Shtetit ka urdhëruar që i dyshuari të dërgohet në mbajtje dhe brenda afatit ligjor të merren veprimet e nevojshme.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
